Ломбо

Шүдний хатуу эдийн эрдэсжилт алдагдан зөөлөрч хөндий үүсэхийг шүд цоорох өвчин гэнэ. Шүд нэгэнт цоорсон бол өөрөө нөхөн сэргэхгүй бөгөөд зайлшгүй зөөлөрч үхэжсэн эдийг цэвэрлэж зориулалтын материал ашиглан  шүдний бүрэн бүтэн байдал болон үйл ажиллагааг сэргээх шаардлагатай болдог.

Манай эмнэлэг нь Солонгос, Америк болон Япон улсад үйлдвэрлэгдсэн эмчилгээний болон ломбоны материалуудыг хэрэглэдэг.

Нэгэнт цоорч хөндий үүссэн шүдийг эмчлэх цор ганц арга бол ломбо тавих юм.  Цоорлыг үхэжсэн эдийн хэмжээ хэр байгаагаас хамааран өнгөц, дунд болон гүн гэж ангилдаг ба үхэжсэн эдийн хэмжээ их шүдний мэдрэл рүү ойртсон дунд болон гүн цоорлын үед шүдний мэдрэлийг цочроохоос хамгаалахын тулд эмчилгээний болон тусгаарлах жийргэвчийг нэмэлтээр тавьдаг. 

Сувгийн эмчилгээ

Шүдний цоорлыг эрт үед нь эмчлээгүйн улмаас цааш даамжирч  шүдний мэдрэлийг цочроож өвдөлт өгч эхэлдэг. Нэгэнт шүдний мэдрэл буюу зөөлцөд  халдвар орсон тохиолдолд мэдрэлийг авч сувгийн эмчилгээ хийх шаардлагатай.  Сувгийн эмчилгээ нь ихэвчлэн 2-3 удаагийн ирэлтээр эмчлэгддэг ба нэгэнт сувгийн эмчилгээ хийлгэсэн шүд амьгүй хэврэг болдог учраас зайлшгүй бүрээс хийж хамгаалах шаардлагатай.

Буйлны эмчилгээ

Буйл болон шүдний хооронд шүдтэй нягт наалдаагүй буйлны ховил нэртэй хөндий зай байдаг ба энэхүү хөндийгөөс дээш нүдэнд үзэгдэхүйц өнгөц байрласан өнгөр чулууны хуримтлалаас үүдэлтэй өвчлөлийг буйлны үрэвсэл гэж нэрлэдэг. Буйлны үрэвсэл нь амнаас эвгүй үнэр гарах, буйлнаас цус гарах, буйл хавдаж улайх, буйл шамарч шүдний ёзоор ил гарах гэх мэт шинжээр илэрдэг. 6 сар тутамд мэргэжлийн эмчид үзүүлэн мэргэжлийн өнгөлгөө цэвэрлэгээ хийлгэх нь буйлны үрэвслээс сэргийлэхэд тусална.

Шүд цайруулалт

Амьдралын хэв маягаас /кофе, цай, тамхи гэх мэт/ хамааран хүний шүдний өнгө шарлан өөрчлөгддөг.  Шүдний шарлалт нь тухайн хүнд гоо сайхны зовиур үүсгэж байгаа тохиолдолд эмнэлгийн орчинд зориулалтын материал ашиглан шүдийг цайруулдаг. Манай эмнэлэг нь шүд цайруулахдаа Солонгос материал ашигладаг.

Имплант эмчилгээ нь хоншоор, эрүүний түүшин ясанд шүдний имплант суулгац (хиймэл ёзоор)-ыг суулгаж алдагдсан шүдний үйл зүйг нөхөн сэргээдэг эмчилгээ юм. 
Имплант эмчилгээг ерөнхийд нь имплант суулгацыг түүшин ясанд суулгах мэс ажилбар болон ястай бороолон эдгэсний дараа имплант суулгац дээр хиймэл шүдэлбэрийг холбож нөхөн сэргээх гэсэн хоёр үе шатанд хуваадаг.
Имплант эмчилгээ нь хүний биеийн хариу урвал, онцлогоос хамаарч үр дүн харилцан өөр байж болно. Тийм учраас илүү үр дүнтэй эмчилгээ хийхийн тулд эмчилгээний төлөвлөгөө болон материалд өөрчлөлт орох, эсвэл нэмэлт эмчилгээ хийх шаардлага гарч болох бөгөөд мөн эмчилгээний хугацаа уртсах магадлалтай байдаг. Ийм тохиолдолд эмч нь үйлчлүүлэгчид эмчилгээний төлөвлөгөө өөрчлөгдөж байгаа тухай болон шалтгааныг тайлбарлаж зөвшөөрөл авдаг.

Тагнайгаа холгуулахгүй, салгаж авахгүй, эвгүй үнэртэхгүй яг л өөрийн шүд мэт суудаг гээд олон давуу талтай имплантын суулгац нь чанарын хувьд  олон янз байдаг. Эдгээрээс хүний биед сөрөг нөлөөгүй нь олон жилийн туршилтаар баталгаажсан титанан материал бүхий OSSTEM брендийн шүдний имплантыг манай эмнэлэг ашигладаг. 
Имплантыг хийхэд эмчийн ур чадвар хамгийн чухал. Зөв байрлалд, шүдний чиглэлийн дагуу имплантыг суулган, ястай бүрэн бороолж эдгэсний дараа тохирсон шүдэлбэрийг хийснээр гоо сайхан, үйл ажиллагаа бүрэн сэргэнэ. Эмчилгээ бүрэн дууссаны дараа амны хөндийн эрүүл ахуйг сайтар сахиж, тогтмол хяналтын үзлэг хийлгэх нь имплантын насжилтыг уртасгана.

Амны хөндийн мэс ажилбар нь жижиг талбайд хийгддэг учир нарийн мэдрэмж, өндөр ур чадвар шаарддаг тул туршлагатай, нүүр амны мэс заслаар мэргэшсэн эмч хийх шаардлагатай. Доорх ажилбаруудыг хийлгэхдээ халдвар хамгааллын дэглэм өндөр, мэс заслын зориулалтын өрөө бүхий  эмнэлэг сонгох нь чухал юм.

Шүд авах
Зайлшгүй заалтын дагуу мөн эмчилгээ авахааргүй болсон үед шүдийг авдаг ба шүдийг авсны дараа хоёдогч халдвар орох хүндрэл үүсэхээс сэргийлэхийн тулд манай эмнэлэг заавал авсны дараах хяналт үзлэг хийдэг.

Уруулын хөвч уртасгах
Уруулын хөвч богино байснаар дээд үүдэн шүднүүд хоорондоо зайтай ургадаг бөгөөд үүнийг диастем гэж нэрлэдэг. Диастем нь гоо зүйн зовиуртайгаас гадна хүүхдийн хэл яриа авиа зүйнд нөлөөлдөг. Жишээлбэл с,ш гийгүүлэгчийг дуудах үед буруу авиа гарах гм... 
Уруулын хөвч уртасгах мэс заслыг нарийн мэргэжлийн нүүр амны мэс заслын эмч хийдэг. Уруулын хөвчийг байнгын шүд ургаж эхлэх үед уртасгавал тохиромжтой бөгөөд ихэвчлэн 5-8 насанд хийлгэхийг зөвлөдөг.

 
Хэлний хөвч уртасгах
Хэл нь амны хөндийн ёроолтой нарийхан туузан хэлбэртэй хөвчөөр холбогддог. Хэрэв энэхүү хэлний хөвч зузаан бөгөөд богинохон бол хэлний хөдөлгөөнд саад учруулдаг. 
Хэл нь амны хөндийн эрхтнүүд, шүдийг шүлсээр норгож цэвэрлэх үүрэгтэй бол хэлний хөвч богинын улмаас хэлний хөдөлгөөн хязгаарлагдаж шүд цэвэрлэх үүргээ алдсаны улмаас хүүхдийн амны хөндийн эрүүл ахуйн орчин алдагдаж шүд цоорох шалтгаан болно. Үүний зэрэгцээгээр доод үүдэн шүднүүд татагдаж гажиг үүснэ.Хэлний хөвч тасдах энэхүү жижиг хэмжээний мэс ажилбарыг frenotomy гэх бөгөөд нарийн мэргэжлийн нүүр амны мэс заслын эмч хөвчин дээр бага зэрэг зүслэг хийн уртасгадаг.

 
Шүдний сурвалжийн орой тайрах
Шүдний рентген зургийг харах үед шүдний сурвалжийн орой орчимд их хэмжээний үрэвслийн голомт байгаа бол сурвалжийн сувгийн оройг тайрах Apicoectomy эмчилгээг хийдэг. Энэхүү ажилбарыг гүйцэтгэхдээ үрэвсэлтэй сурвалжийн орой орчимын буйлан дээр зүслэг хийж нээгээд орой хэсгээс бага зэрэг тайрч аваад зориулалтын материалаар ломбодож буцаан хааж салстад оёдол тавьдаг. Шарх эдгэртэл хэсэг хугацаанд тэр хэсэгт ялимгүй өвдөх зэргээр таагүй байдал үүсэх бөгөөд антибиоток уух болон бусад эмчилгээг тодорхой хугацаанд хийснээр аажимдаа энэ байдал намжина.

Шүдээ авхуулсан дараа удаан хугацаанд шүдгүй явснаар буйл, яс шимэгдэх,  шүд хооронд зай гарах, хажуугийн шүднүүд далийх, эсрэг талын шүд доош унжих гэх мэт эмгэгүүд  үүсдэг. Эдгээр эмгэг үүсэхээс сэргийлэхийн тулд цаг алдалгүй авхуулсан шүдний хоосон зайг нөхөн, үйл ажиллагааг сэргээх шүдэлбэр хийлгэх шаардлагатай. Манай эмнэлэг нь авагддаг болон авагддаггүй шүдэлбэр хийдэг.

Метал тагнайтай авагддаг шүдэлбэр RPD👍 
Шүдэлбэрийн суурийг зориулалтын металын хайлшаар цутган тусгай лабораторид хийгддэг хиймэл шүд юм. Ясны шимэгдэл ихтэй имплант хийлгэх боломжгүй хүмүүст тохиромжтой, Эдэлгээ удаан, хуванцар шүдийг бодвол аманд эзлэх эзэлхүүн бага, зажлалтын даралтыг салст болон тулгуур эдэд дамжуулдаг, авч угааж цэвэрлэх боломжтой. 

 
Бүрээсэн шүд
Шүд том хэмжээний цооролтой, ломбо тогтохооргүй бол, мөн сувгийн эмчилгээ хийсний дараа шүд амьд биш хэврэг болдог учраас зайлшгүй бүрээс хийж хамгаалах шаардлагатай байдаг. Мөн гоо сайхныг сэргээх зорилгоор үүдэнд бүрээс хийдэг.  Шүдний бүрээс нь материалын хувьд метал, метал шаазан, цирконоор хийгддэг ба өөрийн шүднээс  ялгарахааргүй  сүүлийн үеийн дэвшилтэт материал нь циркон юм.

 
Гүүрэлсэн шүдэлбэр
Гүүрэлсэн шүд гэдэг нь шүдгүй хоосон хэсгийн 2 талын шүдийг тулгуур шүд болгон засаж холбоотой авагддаггүй шүд хийн үйл ажиллагааг сэргээхийг хэлдэг. Имплант хийх боломжгүй тохиолдолд тохиромжтой. 2 талын шүдийг бүрээс хийхэд зориулан зордог ба шаардлагатай бол сувгийн эмчилгээ хийдэг.